سياسة الخصوصية
آخر تحديث: 8 أكتوبر 2026
تمرينة تطبيق للكباتن اللي بيدرّبوا وجهاً لوجه في مصر وللعملاء بتوعهم. الصفحة دي بتقول تمرينة بتحتفظ بإيه، وليه، ومين بيشوفه، وإزاي يتمسح.
تمرينة بتحتفظ بإيه
- الحساب: الاسم ورقم الموبايل (الكابتن بيكتبهم، أو تمرينة بتكتبهم للكباتن)، والباسورد (محفوظ بشكل متشفّر مايرجعش زي ما كان)، ولغة التطبيق، والنوع لو الكابتن ضافه.
- التدريب مع الكابتن: مين الكابتن، وأيام ومواعيد التمرين، والبرامج والملاحظات اللي الكابتن بيكتبها، وإمتى الحساب كان شغال أو متوقف.
- التمارين: كل حصة بتتسجل، سواء سجّلها الكابتن أو العميل، بتاريخها ومواعيدها والتمارين اللي فيها، ووزن وعدّات أو ثواني كل مجموعة.
- قياسات الجسم: الأوزان ونتايج الإنبودي (الوزن، وكتلة العضل، وكتلة الدهون، ونسبة الدهون، ومعدل الحرق في الراحة، ومستوى دهون البطن الداخلية)، اللي العميل أو الكابتن بيكتبها، وصورة ورقة الإنبودي لو اتضافت.
- للكباتن: التمارين والبرامج ولينكات الفيديو اللي الكابتن بيضيفها، وبيانات العملاء اللي فوق.
ليه
عشان الخدمة تشتغل: البرامج والتقدم يظهروا، والحصص تتسجل، والموبايلات تفضل متزامنة، والحسابات تفضل في أمان. تمرينة مابتبيعش البيانات ومابتستخدمهاش في إعلانات.
مين بيشوفها
الكابتن بيشوف حساب العميل وتمارينه وقياسات الجسم. العميل بيشوف اسم الكابتن ورقمه. ومحدش تاني من مستخدمين تمرينة بيشوفهم، وصور ورقة الإنبودي عمرها ما بتبقى متاحة للعامة: العميل والكابتن بس اللي يقدروا يفتحوها. اللي بيديروا تمرينة يقدروا يشوفوها لما يكون ده لازم لتشغيل الخدمة أو لحل مشكلة.
الخدمات اللي تمرينة بتستخدمها
- DigitalOcean: قاعدة البيانات وصور ورقة الإنبودي على سيرفرات في فرانكفورت، ألمانيا.
- PostHog (سيرفرات في الاتحاد الأوروبي): أرقام الاستخدام، زي الشاشات اللي بتتفتح، وحفظ المجموعة بياخد قد إيه، ونسخة التطبيق، وموديل الموبايل، والمدينة أو المحافظة من عنوان الإنترنت. بيوصله رقم عشوائي مكان الشخص، ومش بيوصله أبداً اسم ولا رقم موبايل ولا أي حاجة بتتكتب.
- Sentry (سيرفرات في الولايات المتحدة): تقارير الأعطال: العطل نفسه، ونسخة التطبيق، وموديل الموبايل. الأسامي والأرقام والباسوردات بتتشال الأول، ومفيش أي رقم بيدل على الشخص.
- Google Play وApp Store بيوصّلوا التطبيق، وليهم سياسات خصوصية خاصة بيهم. لينكات الدعوة والملخصات اللي بتتبعت من التطبيق بتعدّي على واتساب.
على الموبايل
التطبيق بيحتفظ بنسخة من البيانات على الموبايل عشان يشتغل من غير نت. تسجيل الخروج بيمسحها من الموبايل. إلا صور ورقة الإنبودي: التطبيق بيعرضها وهو مفتوح بس، ومابيحتفظش بنسخة منها على الموبايل.
بتتحفظ لحد إمتى
طول ما الحساب موجود. لما الحساب يتمسح، بياناته بتتمسح من قاعدة بيانات تمرينة على طول، والنسخ اللي في الباك أب بتختفي خلال 30 يوم. أرقام الاستخدام بتفضل في PostHog بالرقم العشوائي، اللي مابقاش بيوصّل لحد.
مسح الحساب
من التطبيق: حسابي، وبعدين مسح الحساب. من الويب: الصفحة اللي تحت. أو بالتواصل مع تمرينة.
المسح بيشيل كل اللي فوق: الحساب، والتمارين، والأوزان ونتايج الإنبودي وصور الورقة.
مسح حساب الكابتن بيمسح كمان حسابات العملاء بتوعه وسجل تمارينهم وقياساتهم. العملاء اللي هم كمان كباتن بيفضل حساب الكابتن بتاعهم.
الحقوق
من حق صاحب البيانات يطلب يشوفها أو يصححها أو يمسحها، أو يعترض على طريقة استخدامها، بالتواصل مع تمرينة. الكابتن يقدر يصحح أغلب البيانات من التطبيق. وبحسب قانون حماية البيانات الشخصية المصري (رقم 151 لسنة 2020)، ممكن كمان تقديم شكوى لمركز حماية البيانات الشخصية.
السن
تمرينة للناس من سن 16 سنة وطالع.
الأمان
الاتصال متشفّر (HTTPS)، والباسوردات محفوظة متشفّرة، وقاعدة البيانات مش متاحة من الإنترنت، ولوحة الإدارة محتاجة باسورد وكود من تطبيق مصادقة.
التغييرات
لما السياسة دي تتغير، الصفحة وتاريخها بيتغيروا. والتغييرات الكبيرة بتتعلن في التطبيق.
التواصل
تمرينة بيديرها Adham Ahmed.
الإيميل: memezawybusiness@gmail.com